Wis Ginaris

Jare sliramu wis tata-tata

Nampa warta

Nanging ngapa

Ndadak ana luh

kang tumetes saka waspa

Mangertia

Gusti Allah maha pirso

Sliramu mesti isa nampa

Apa wae

Kang wis ginaris

Tanpa perlu enda

Merga kabeh mau

Drajate menungso

Tetep ora bisa sulaya.

Rembulan Krowak

Wengi iki mbulan krowak

Ora bakal ana purnama

Padange wengi maya-maya,

Wengi iki cahya lintang

Alum

Ora cumlorot kaya adat saben

Wengi iki

Atis

Ngungun

Nunggu embun.

Pepesthen

Lahir, jodo, mati

Kabeh wis ginaris

Manungso mung titah sawantah

Kudu nampa

Tanpa bisa sulaya

Kaya ta srengenge

Kang kudu teka saben rina

Madangi bumi saisine

Tanpa iso suwala

Kaya ta mbulan

Kang kudu ngancani lintang

gawe kaendahaning wengi

Mula

Aja gampang kuciwa

Yen pepesthen kui mau

Ora kaya sing diganta

Saben dino

Apa Tenan Kuwi Penjenengan

Nalika penjenengan rawuh ngasta warta

Ndahepa senenge aku nampa

Arepa mung ing awang-awang

Ra kasat mata

Pa meneh nalika penjenengan paring geguritan

Ngemu rasa

Aku arep selak

Ning nganggo cara apa

Bab sakbenere

Ati wanitaku mongkog....

Pasuryan panjenengan ngegla

Neng ngarep mata

Apa tenan kuwi panjenengan?

Sing rawuh kanthi sesidheman

Ngasta sandi

Kanggo mbukak ati?

Apa tenan kuwi penjenengan?

Kang sawetara iki

Ngesuhi pikiran

Nanging ra tau ngawujud

Kejaba neng angen-angen

Muhdela 251008

Sansaya Garing

Gawang2 wewayangan ngreridu ati

kagawa rasa ngungun

nyawang tetanduran sansaya garing

kapan bakal ngrembaka?

pa kudu ngantu-antu

tibaning udan wayah rendheng

kapan ?

pa mung kudu nunggu tumetesing embun wayah esuk

sing uga bisa nyirami ati kang kebak rasa

sing tak ganta

kapan bakal teka ?

dene sing ana

mung rasa keranta-ranta....

Okt 08

Ora bakal cidra

aji apa maneh

sing kok tamaake marang awakku

dene nganti pirang-pirang ratri

mripatku raiso merem

ing endi papan

ing ngendi wayah

wewayanganmungreribet ati

aji apa meneh

sing kok tamaake marang awakku

apa sliramu kpingin

aku cidra ing janji

kang bakal gawe rekasaning uripku

ora

arepa ming sak pucuking jari

apa meneh kok tangan sesisih

sing jelas aku ora kepingin invalid

aja

aja kok titipke marang aku atimu

amarga ora bakal rinengga

percaya-a

aku ora bakal cidra

magelang juli 2001

Nelangsa

Kang ana mung nelangsa

Rikala

Nggoleki sliramu ora ana

tekan ngendi anggonku kudu lungo

rasaku saya was-was

yen sluramu bakal ninggal plas!!

Tanpa kanda

Tanpa sapa

Arepa mung ninggal donga

Dina-dina lumaku saya dawa

Dene aku kelangan tresna

Amarga sliramu ara nate ngegla

Ing sak ngareping netra

Nelangsa

Kang tak rasa saya ngrembaka

Jroning dada

Okt 2000

Dina kang mesti

Rasa ngelangut iki

Tansaya krasa ngerujit ati

Dene

Isih ana tangan-tangan kumlawe

Asung suka

Ing dina kang mesti

Pasuryan iki dadi tanpa werna

Cayane bias

Ilang tanpa tilas

Kang ana mung pucet

Kusem

Dina-dina kang lumaku tanpa daya

e... e.... lagi krasa

semene abote sanggane rasa

tan kinira tan dinyana

sutresna iku tan bisa onya saka rasa....

miliran 151287