Cunthel

Bareng mireng suara bedhug

Kabeh dadi cunthel

Ilang plas

Apa kang arep tak aturake

Marang sliramu

Suara bedhug

Ndhodhogi dada

Gawe getering raga

Nyirnakke daya

Kabeh dadi cunthel

Nalika ora iso adu arep

Karo sliramu

Kamangka wis akeh panjangka

Kang arep diaturake

Tanpa ana piyayi liya

Cunthel

Sing ana mung wewayangan

Kang gegla ngebaki netra

Nggawa tresna kebak rasa

yk 290909

Apa Aku Salah?

Pancen bener

Dinamu beda

Dinaku beda

Dinamu dinaku pancen beda

Apa aku salah

Yen ngantu-antu rawuhmu

Apa aku salah

Yen saben-saben keprungu suaramu

Banjur gragapan

Golek cekelan

Apa aku salah

Yen sak wayah-wayah nunggu wartamu

kang kumleyang kagawa angin

lang temangsang ing pucuk-pucuk ranti

Dinamu dinaku pancen beda

Apa aku salah

Yen aku duwe gegayuhan

Dinamu dinaku pada pada

yk 290909

Wis Ginaris

Jare sliramu wis tata-tata

Nampa warta

Nanging ngapa

Ndadak ana luh

kang tumetes saka waspa

Mangertia

Gusti Allah maha pirso

Sliramu mesti isa nampa

Apa wae

Kang wis ginaris

Tanpa perlu enda

Merga kabeh mau

Drajate menungso

Tetep ora bisa sulaya.

Rembulan Krowak

Wengi iki mbulan krowak

Ora bakal ana purnama

Padange wengi maya-maya,

Wengi iki cahya lintang

Alum

Ora cumlorot kaya adat saben

Wengi iki

Atis

Ngungun

Nunggu embun.

Pepesthen

Lahir, jodo, mati

Kabeh wis ginaris

Manungso mung titah sawantah

Kudu nampa

Tanpa bisa sulaya

Kaya ta srengenge

Kang kudu teka saben rina

Madangi bumi saisine

Tanpa iso suwala

Kaya ta mbulan

Kang kudu ngancani lintang

gawe kaendahaning wengi

Mula

Aja gampang kuciwa

Yen pepesthen kui mau

Ora kaya sing diganta

Saben dino

Apa Tenan Kuwi Penjenengan

Nalika penjenengan rawuh ngasta warta

Ndahepa senenge aku nampa

Arepa mung ing awang-awang

Ra kasat mata

Pa meneh nalika penjenengan paring geguritan

Ngemu rasa

Aku arep selak

Ning nganggo cara apa

Bab sakbenere

Ati wanitaku mongkog....

Pasuryan panjenengan ngegla

Neng ngarep mata

Apa tenan kuwi panjenengan?

Sing rawuh kanthi sesidheman

Ngasta sandi

Kanggo mbukak ati?

Apa tenan kuwi penjenengan?

Kang sawetara iki

Ngesuhi pikiran

Nanging ra tau ngawujud

Kejaba neng angen-angen

Muhdela 251008

Sansaya Garing

Gawang2 wewayangan ngreridu ati

kagawa rasa ngungun

nyawang tetanduran sansaya garing

kapan bakal ngrembaka?

pa kudu ngantu-antu

tibaning udan wayah rendheng

kapan ?

pa mung kudu nunggu tumetesing embun wayah esuk

sing uga bisa nyirami ati kang kebak rasa

sing tak ganta

kapan bakal teka ?

dene sing ana

mung rasa keranta-ranta....

Okt 08